A’me Sunntachmorjet war’s,
noh’me lange Rekrutebal.
Mied un matt vum ville Spille
un, gsaat sei’s, mit schwache Glieder
sin Musikante, all mitzamm sechs Mann,
langst die Lohmkaul homwärts gang.
Es Ziddre packt de Ewald pletzlich:
- Buwe, was do hinne kummt is schrecklich! -
- E Wildschwein – klingt’s aus ooner Kehl
un all renne se wie die Reh.
Die Miedichkeit war fort im Nu,
kooner denkt meh an die Ruh.
De Ossi is gerennt mi’m Bass,
glaabt mer Leit, des war ka Spass.
Oone Gedanke war in alle Kepp:
Vun do musst wech, norr wech.
Zum Glick war’s eerschte Haus net weit,
sunst kooner meecht meh lewe heit.
De Franz, der war am meist verstawwert,
uf de Holzhaufe is der gekrawwelt.
Die annre hun rum ehne gstan
un todernst e Kriechsrat ghall:
- Mer blose in die Inschtrumente,
wie die Jächtler in de Wälder,
des Biest kriet dann bestimmt die Fraas
un laafe werd’s so wie e Has. -
In die Trumpete hun se geblos aus Leiweskraft,
dass mer’s gheert hot bis Brickena.
Norr des Wildschwein hot nicks gheert
un war jetz schun ganz gfährlich neeckst.
Die Sechs hun wirklich alle Farwe gspillt,
bis endlich s’Glick uf ehre Seit sich gstellt.
Uf der Gass e ältre Mann
grad uf’s Viech drufzu is gang.
Wer hätt sich denn so was gedenkt?
Der Mann ruft zu dem Schwein: - Marcel, Marcel. -
Jetz hun unser Helde sich vor Lache verboo,
die Angst war wie im Wind verfloo.
Des Wildschwein, wu Marcel hot ghaaß,
war dem Mann aus’m Stall gelaaf.
Der hot sei Schweinsbär wedder gholl,
awwer die Musikante, die hatte die Hosse voll.
Berns Toni
Worterklärungen: Brickena = Bruckenau, Dorf im rumänischen Banat
Schweinsbär = Eber
aus Neue Banater Zeitung / Pipatsch
